Bang bang in Catholics te in Mary tung ah thungen hiam cih ih tel theih na ding in, a masa in Catholics te in Mary leh Misiangtho te bia lo hi cih tel kul hi. Misiangtho te tung ah thu ih nget pen mi khat peuh kiang ah “thu ong nget sak in” ih cih tawh ki bang hi. James laisiangtho in hi bang in na gen hi:
“…Mihoih te thunget na in vang lian in na lian pi sem zo hi.” James 5:16
Hih lei tung aa om te leh vantung aa om te kua maan/hoih zaw ding a hi hiam? Hih a tung aa ih laisiangtho in a mau thunget na vanglian ci a hih man in misiangtho te’n thu ong nget sak na ding aa a mau tung ah a thuum/ngen ih hi hi. Tua a hih leh a mau te in ih thunget na ong za uh diam? Ong za uh hi, Jesus in hi bang in na gen hi:
“Misite thawhkikna thu tawh kisai-in note tungah a gen thute sim ngeilo na hi uh hiam? Pasian in, ‘Kei pen Abraham' Pasian, Isaac' Pasian, Jakob' Pasian ka hi hi,’ ci hi. Pasian pen a si mite' Pasian hiloin a nungta mite' Pasian ahi hi,” a ci hi.” Matthew 22:31-32
Pasian in kei pen Abraham, Isaac leh Jacob Pasian hing, misi te Pasian hi lo in a nungta mi te Pasian hing na ci a hih leh Abraham, Isaac leh Jacob te a nung ta hi mawk lo ding a hi hiam? A mau te sih bel ki thei ven vantung a tun uh laisiangtho in gen kei. Luke 16 ah bel Jesus in Lazarus leh mi hau pa thu a gen na ah Abraham van ah om ci ven. Hih mun ah ih theih ding thu khat in Jesus in vantung aa om mi te a si hi lo in a nung ta a hih na uh lim tak ong gen khin zo hi. Tua a hih man in ei pen misi sa te tung aa thungen hi lo in a nung ta misiangtho te tung aa thungen ih hi hi.
“Tua lai-ah Moses leh Elijah hong omvat uh a, Jesuh tawh a kiho a mu uh hi. Tua ciangin Peter in Jesuh kiangah, “Topa aw, hih lai-ah i om, nuam mahmah hi. Hoih na sak leh, nang-a' ding buk khat, Moses-a' ding buk khat, Elijah-a' ding buk khat, buk thum ka hong lamsak ding uh hi,” a ci hi. Tua bangin a pau laitakun meiingo hong kaii vatin amaute hong khuh a, tua meii lak panin aw khat hong ging vatin, “Hihpa pen ka it, ka lung a kim mahmahna ka Tapa ahi hi. Ama thu na ngai un,” a hong ci hi.” Matthew 17:3-5
Hih teng ah Jesus mel a ki khel lai tak in, hih leitung ah bang piang cih a thei Moses leh Elijah, te tawh ki ho in, thu ki kum uh hi. Hih mun ah ih theih ding thu khat in hih leitung aa om mi te leh vantung aa om te, sih na na ngawn in ong khen zo lo hi cih ih mu thei hi. Paul in ei te khempeuh pen pawlpi lutang a hi Jesus pumpi ih hi hi ci in ong hilh cian khin hi. (1Cor 23)
Hebrew laisiangtho in ong hilh thu khat a hih leh ei mai aa vantung a pai mite in hih lei tung thu te ong theih pih lai hi cih ih mu hi.
“Tua hi a, eite in i kiim i pamah hih zahin a tam teci nei ihih ciangin eite a hong khawl / dongtangsak thei nate khempeuh leh eite a hong gakcip mawhna leh khialhnate khempeuh paikhia-in, i mai-ah a om taina ding lampi a mong dongin lungsim kiptakin tai ni.” Hebrew 12:1
Eite khempeuh Jesus pumpi ih hih man in, sih na nangawn in Jesus tawh ong khen zo tuan lo hi. Jesus in eite khat leh khat thu ki nget sak ding ki sam lo hi leh ong gen khin ding hi a hi zong in Jesus in eite khat leh khat thu ki nget sak ding ong gen hi. Pasian in pawlpi leh khat leh khat thu ih ki nget sak na hang in ei te thupha ong pia cih pen Paul tung pan leh Laisiangtho mun tam pih ah ong gen khin zo hi.
Vantung aa om misiantho te in ih thunget na te ong za hi cih pen Mangmuhna Laisiangtho ah lim tak in ih mu thei hi.
“Tua laibu a lak khit ciangin, ganhing lite leh upa sawmnih le li te, Tuuno' mai-ah a kun uh hi. Amaute in harp tum ging lasakna khat ciat leh Pasian' mi siangtho te thunget a hi paknamtui a dimin a om khaam beel khat ciat a tawi uh hi.” Revelations 5:8
Jesus kiang ah hih leitung aa ih thunget nate a puak/pia a hi (misiangtho te leh vantung mi te lim lak) ganhing te leh upate ih mu hi. Chapter 8 na ah vantung ah thupiang khat ih mu kik hi. Tua in:
“Tua ciangin kham tawh kibawl paknamtui kuang a tawi vantung mi adang khat hong pai-in biakna tau mai-ah a ding hi. Tokhom mai ah a om kham tawh ki bawl biak na tau ah a piak ding in paknamtui tampi tak leh Misiangtho te thunget nate a matung ah ki pia hi. Tua vantung mi' khutsung panin paknamtui khu leh Misiangthote' thungetna Pasian kiang ah a paito hi. Tua ciangin tua vantung mi in paknamtui kuang la a, biakna tau panin mei-am la-in a sungah a koih khit ciangin leitungah lawn'suk a, nakpi takin van ging in zin ling a, khua phia-in kek a kia hi.” Revelations 8:3-5
Jesus in vantung aa om mi te in hih leitung thu ong theih pih na leh direct aa ih ki zop na bang dan in na gen hiam cih en ni.
“…A muh ciangin a lawmte leh a vengte samin amaute kiangah, ‘Ka sum man'suahsa mukik ka hih manin ka nuam mahmah hi. Lungdamna pawi bawl ni,’ ci ding hi. 10Tua mah bangin mawhnei mi khat a kisikkikna hangin Pasian' vantung mite lungdam mahmah uh hi,” a ci hi. Luke 15:7-10
Mawh nei mi khat ki siik kik na hang in vantung mi te lung dam in nuam uh a hih leh hih leitung aa thupiang te a mau zong ong theih pih hi cih pen hih Laisiangtho in lim tak ong hilh khin hi. Tua a hih man in vantung misiangtho te kiang thu ong nget sak na ding un ih thuum pen laisiangtho tawh a ki tuak loh na om lo hi. James sung ah mi siangtho mi hoih te thunget na vanglian ci a hih man in ei sang' a siangtho a hoih zaw mi te kiang thu ong nget sak un ci aa ki thuum hi cih kit el thei hi.
Luke 16 na sung ah Jesus in Lazarus leh mi hau pa thu gen teh na na gen hi. Leitung pumpi a si sa mi te na ngawn in hih leitung mi te nun tak na thei lai hi cih ong lak bek tham lo in ong thum sak lai hi.
Mi khat peuh in a mau vang liat na tawh van gam a tun theih loh mah bangin misiangtho te in zong a mau vangliat na tawh ih thu nget nate ong za thei tuan lo uh hi. A hih hangin, Pasian hehpih na tawh van gam a lut uh ciang in Jesus tawh pum khat suak uh hi. Tua a hih man in Pasian hehpih na sung ah ei te ngaih sut theih na sang a sang zaw in, hehpih na na sang uh hi. Pasian pen mun khempeuh ah hunk hat thu in om thei (omnipresent) a hih man in, Pasian in a piak nop leh tua vantung aa om Misiangtho te in zong Pasian tawh pum khat suah na hang in tua vang liat na traits nei uh hi. Vantung aa om Misiangtho te aa ding in thu nget na khempeuh zak theih na ding in omniscience letsong ki sam lo hi, a hih hang in hih leitung ngei na sang in a sang zaw siantho na Pasian tawh pum khat suah na bek hi sam hi.
Ih phawk ding thu khat in vantung nun tak na pen leitung nun tak bang in (TIME AND SPACE) hunte nite in khih cip nawn lo hi. Vantung ah hun cih om nawn lo in tawn tung cih bek om hi. Tua a hih man in hih ih leitung nun tak na tawh a ki ciang tan ngaih sut theih na tel theih na (limited understanding) te ma suan in hih thu te ih tel sawm loh ding ih khen sat loh ding thupi ding hi.
Laisiantho mun mah bul phuh in, (Tradition of the Church) pawlpi ngei na leh Pasian thu tawh ki tuak in a ki sang sa a hi misiangtho te in ih thunget na ong za uh a hih man in Misiangtho te tung leh Mary tung ah thu a ki ngen a hi hi. Misiangtho te tung aa thunget pen Misiangtho te a ki bia leh a kipah tawi hi lo hi cih tel kul hi. Hih leitung ah mi khat peuh kiang thu ong nget sak in ih cih mah bang in, vantung aa om ih sang gam te kiang thu ong nget sak in a ki ci hi zaw hi.
Mary pen Luke 1:28 sung ah
“Pasian maipha ngah nu, Pasian in nang tawh om khawm hi, numei khempeuh lak ah thupha ngah nu”
aw ci in vantung mi Gabriel na ngawn in zah tak na na pia hi. Mary la sung ah mi a khang a khang in thupha ngah nu hong ci ding hi ci in a ki ko na zong ih za hi. Jesus nun tak na sung ah Mary’ pan mun pen neu seek theih thu hi lo hi. Jesus lo ngal kua mah in ka nu ding ci in kitel thei lo hi. Tua bek en leng zong Jesus in Mary pen zah tak na piak aa, a tel tuam mah bang in, en zong zah tak na piak ding pen a ki sam mah mah thu hi. Eite in Jesus sang gam te ih hih leh Mary lo ngal ih kha a ding in ih nu spiritual mother dang om thei lo hi.
John chapter 2 aa Wedding in Cana ah inn tek pa wine a bei ciang in Mary in Jesus Pasian hi ci aa a theih na tawh huh na a nget ciang in Jesus in ka hun tung nai kei ci mah ta se leh Mary nget na hang tawh a masa pen na lam dang na bawl hi. Jesus in a ma vangliat na a lah khiat ding hun tung nai kei ta leh zong, a nu nget na hang in na na sem veve cih pen ngaih sut huai mah mah hi. Hih in ong muh sak pen a hih leh Jesus tawh ih ki kaal ah Mary in ei aa ding in na lian tam pi ong nget sak thei hi. Tua a hih man in nu pawlpi in Mary tung ah huh na intercession ong sep sak nang in a ki ngen hi aa Mary a ki bia hi lo hi.
Lai sim mi mal khempeuh in ih tel kim theih na ding in ih biak Pasian in thupha ong pia ta hen. Nong sim sak uh ka lungdam. Mi dang ten zong a sim theih na ding in a link pan na share sak sawn in. Tel loh leh dawt nop a om leh lai ong khak in
No comments:
Post a Comment